काठमाडौँ,१० असार । इरानको मिसाइल आक्रमणमा परी इजरायलमा ३ जनाको मृत्यु भएको छ। दक्षिण इजरायलको बियर शेभा सहरमा रहेकोआवासीय भवनमा मिसाइल आक्रमण हुँदा ३ जनाको मृत्यु भएको इजरायली आपतकालीन सेवाहरूले पुष्टि गरेका छन्।
आपतकालीन सेवा मगेन डेविड अदोमका अनुसार गम्भीर घाइते भएका ४० वर्षीय पुरुष, ३० वर्षीया महिला र २० वर्षीय युवकको मृत्यु भएको हो।
घटनामा थप ६ जना व्यक्तिहरू घाइते भएका छन्। उनीहरूको अहिले उपचार भइरहेको छ। इजरायली डिफेन्स फोर्सेसले इरानबाट इजरायलतर्फ मिसाइल प्रक्षेपण भएको पुष्टि गर्दै नागरिकहरूलाई सेल्टरमा जान निर्देशन दिएको छ।
